Традиционално по деветнаесетти пат на 24 декември 2012 година во Хотел “Stone Bridge”, во организација на Државниот завод за индустриска сопственост на Република Македонија, се одржа манифестацијата “Патент на годината -2012”.
На свечениот настан беа присутни пронајдувачи, претставници од стопанството, застапници и други еминентни гости кои директно и индиректно се вклучени во активностите на заштитата на правата од индустриска сопственост. Манифестацијата беше отворена со поздравниот говор од страна на директорот на Заводот г-динот Сафет Емрули.
На почетокот, во рамките на програмата беа презентирани пронајдоците на македонските пронајдувачи кои беа претставени на Меѓународната изложба на идеи, пронајдоци и нови производи – IENA 2012, која се одржа од 01 до 04 ноември во Нирнберг, Германија. Посебна нота на настанот и даде свеченото врачување од страна на заменик директор г-дин Мите Костов, на наградите доделени од страна на меѓународното жири и специјалните награди во следниот редослед:
-ЗЛАТЕН МЕДАЛ од стручното меѓународно жири, Плакета со диплома од Министерството за образование, истражување, млади и спорт на Романија и ЗЛАТЕН МЕДАЛ со диплома од Руската асоцијација за меѓународна научна и техничка соработка, на пронајдувачите Смилески Стојче и Смилески Таско, за пронајдокот “Интегрирана сопирачка за вртливи подвозки”;
-СРЕБРЕН МЕДАЛ од стручното меѓународно жири, ЗЛАТЕН МЕДАЛ со диплома од Друштвото за пронајдоци и дизајн на Малезија, на пронајдувачот Јоти Поповски, за пронајдокот “Анаеробна прочистителна станица со биофилтрација”;
-БРОНЗЕН МЕДАЛ од стручното меѓународно жири, ЗЛАТЕН МЕДАЛ со диплома од Руската асоцијација за меѓународна научна и техничка соработка, на пронајдувачите Јакуп Кадриу и Арбен Зибери за пронајдокот “Препарат за уништување на инсектот – Блатида Германика”;
- БРОНЗЕН МЕДАЛ од стручното меѓународно жири, ПЛАКЕТА со диплома од Сојузот на пронајдувачи на Унгарија, СЕРТИФИКАТ за придонес во пронаоѓаштвото од Здружението на жени пронајдувачи НОВА од Босна и Херцеговина на пронајдувачот Жаклина Стамболиска, за пронајдокот “Метода за проактивно следење на состојбата на споро вртечки машини”;
-БРОНЗЕНА АРКА со диплома од Здружението на пронајдувачи на Хрватска, на пронајдувачот Влатко Здравковски за пронајдокот “Еднофазен електричен исправувач за напон 12V и струја 5А”.
Престижната Награда “ПАТЕНТ НА ГОДИНАТА -2012” беше свечено доделена за пронајдокот “Интегрирана сопирачка за вртливи подвозки”, на пронајдувачите Смилески Стојче и Смилески Таско и свечено им ја врачи директорот на Заводот Сафет Емрули. Пронајдокот претставува значајно техничко усовршување на системот за сопирање кај шинските возила.
Целта од одржување на настанот е не само да се поттикне креативноста и творештвото на мекедонските пронајдувачи туку и да се искористи системот на заштита на правото со патент во нивното деловно работење.